.xxx. rois ai vencus, à Deu en rent mercis.
N’i a cil ne me serve volentiers, non envis,
Et cascuns d’els m’amaine .xx. m. fervestis.
Acuité ai ma tere environ mon païs.
Nus ne m’i fait mais guerre, tant i soit segnoris,
Fors rois Yus de Gascoine, ki tos est asotis,
Qui contre moi recete mes mortes enemis,
Les .iiii. fix Aymon que tant jor ai haïs.
Nen ere mais joians, ses averai honis.
« Segnors, dist Charlemaignes, entendes ma raison
Mainte terre ai conquisce et mainte region
Dont li segnor me servent ou il vollent ou non.
Nus ne m’i fait mais guere le pris d’un esporon,
Fors Yon de Gascoigne, si com nos vos dison,
Ki contre moi recete [les] .iiii. fis Aymon[1]
Et Maugis lor neveu qui ait maleïçon,
Certes que jo hac plus, por voir le vos dison,
Que ne fas tos les homes desi en pré Noiron.
Segnor, à vos me claim, nobile compaignon ;
Ne volroie plus vivre, mes que les tenison.
Por icel Deu de glore, ki vint à passion,
De racat n’en prendroie tot le [tresor] Oton ;[2]
Ains le feroie ardoir en fu et en carbon.
Ne sai que semonsisse cascun à sa maison ;
Quant ci estes ensanble, orendroit vos semon.
Montauban asaurai, la tor et le dongon.
Ki Renaut pora prendre, molt m’aura fet jan don.
A tos jors l’amerai comme mon compaignon. »
Respont Do de Nantuel : « Bel sire, non feron,
De Sassoigne venimes, li termes n’est pas lons,
Bien a passé .v. ans ne fui en ma maison,
Ne ne vi ma mollier, ne cil autre baron ;
Or nos resomont cil de faire autre besoin.
Et qui poroit sofrir tante percussion !
Vos nos faites vellier, ou nos vellons ou non ;
Et si jeson as cans, en noif et en glaçon.
Les cies avons cenus et tot flori enson.