Là troveres le roi Charlemaigne au vis cler
Et Naimon à la barbe et Ogier le sené.
L’empereor de France i ferois seürté
Et il vos ensement, puis serois acordé.
Adonc aurois vos terres et vos grans iretés. »
« Sire, ce dist Renaus, merci, por amor Dé.
Ja saves vos de fi, l’empereres nos het
Et se il nos puet prendre, à mort somes livré.
De trestot l’or del mont ne serons rachaté.
Que ne soions pendu et en haut encroé. »
« Certes, ce dist li rois, por noiant en parles,
Que je ai fiancié le miels de son barné.
Cheval ne palefroi avec vos ne menres,
Mais deseure ces muls vos mentiaus afublés
En vos mains flors de rosse por vos cors deporter. »
« Sire, ce dist Renaus, si com vos comendes,
Nos irons volentiers puis que vos le voles. »
« Hé Dex ! dist Aallars, qui oï onques tel ?
Chevaliers qui se doute, c’on desfent à armer ?
J’ai oï l’emperere et plevir et jurer
Que se il nos puet prendre, les chies aro[n]s copés.[1]
Se g’i vois sens mes armes, Dex me puist craventer. »
« Baron, ce dist Renaus, car me laisies ester.
Ja dame Deu ne place, qui en crois fu penés,
Que je de riens mescroie mon seignor naturel.
Nos irons volentiers com il iert ajorné.
Le comant mon seignor ne doi pas refuser. »
J’ai guerroié le roi tes .vii. ans tos entiers,
Que je ne giu en borc ne en chastel plenier,
Mais en bos ou en [plains] comme lerres fossiers.[2]
L’amistié mon seignor me doint Dex porchacier.
En langes en iroie dusqu’al mont Saint Michel. »
Li dus Renaus avale contreval le planchié
Et encontre sa fame, le suer Yon le fier.
Clarisce la cortoise, au gent cors envoisié,