« Si feres, dist Allars, ja n’aurois se bien non. »
[« Par foi, ce dist Guichars, et nos le vos diron][1]
Ja me tramble li cors soz l’ermin peliçon ;
Unques mais en ma vi[e] n’oi ausi grant friçon.[2]
Si me drece li peus tot droit encontremont.
Molt me criem et redote k’i n’i a[i]t traïson ;[3]
Certes traïs nos a li rices rois Yon. »
Lor apelent Renaut, si l’ont mis à raison :
« Frere, ke faison ci, quant nului n’i trovon ?
S’or avoit ci armé jusqu’à .iiii. garçons,
Mener nos en poroient comme .iiii. bricons ;
Et nos avons en France tant enimis felons
Ki de la mort nos heent sans nule raençon.
Ki cerf cace, cerf prent, pieça ke le dit on.
Unques ne vosis croire cose que deïsson.
Renaus, alons nos ent, por Deu et por son non,
Tot droit à Montalban en la mestre maison ;
Car se estiens là sus en cet maistre dognon,
Si eüssiens Baiart et Maugis le laron,
Ne doterie[n]s Charle vallant .i. esporon.[4]
Alons nos ent, por Deu, n’est se folie non.
Certes li rois Yon nos tient bien por bricon,
Ki ci nos fist venir as mantiaus vermellons.
Je ne cerroie mie k’il n’i ait traison. »[5]
« Par foi, ce dist Renaus, nos vos otroions.
Or descendons à tierre, nos mule recenglon. »
Et il si firent senpres sans nul arestison.
Atant se regarda Renaus, li fil Aymon ;
Al gues de Vairepaine, encontre Balençon,
.M. chevaliers coisi, fremés les confanons ;
Il les conuit molt bien, quant il vit lor ados
Et coisist des vers hiaumes l’orguel et la buor,[6]
Page:Castets - La Chanson des quatre fils Aymon, 1909.djvu/504
Le texte de cette page a été corrigé et est conforme au fac-similé.
476
les quatre fils aymon
![](http://upload.wikimedia.org/wikipedia/commons/thumb/b/b0/Castets_-_La_Chanson_des_quatre_fils_Aymon%2C_1909.djvu/page504-1024px-Castets_-_La_Chanson_des_quatre_fils_Aymon%2C_1909.djvu.jpg)