Il vont baisier Renaut le vis et le menton
Et pleurent tuit ensamble li nobile baron.
« Sire, dist Aallars, ki les cevels ot blons,
Por coi nos a[s] traïs, jantis fix à baron ?[1]
Ja n’estions nos mie Normant ne Borgenon
Ne Flamenc ne Englois, Poitevin ne Breton ;[2]
Ançois somes [tuit frere], pres nos apertenon,[3]
D’un pere et d’une mere, molt nos entramion.
Vos estes nostre sire et nostre confanon.
Por Deu, sire Renaus, dont vint la traïson ?
Ja somes nos neveu Gerart de Rosellon
Et Doon de Nantuel et duc Buef d’Aigremont.
Icil .iii. furent frere, n’en ot mellors el mont.
Unques vostre linages ne pensa traïson. »
« Segnor, ce dist Renaus, jo ai pecié de vos.[4]
Jo vos i amenai ou volsissies ou non ;
Se Deu plaist et sa mere, si vos en ramenron.
Or nos consaut cis sire ki Longis fist pardon.
Aideres nos vos ore, li viscuens d’Avignon ?[5]
Et vos, segnor baron, ja nos conduisies vos ? »
Et cil ont respondu : « Ja nos [n’]en mellerons.[6]
Ja de nos n’i aurois aïde ne secors ;
Ains nos en fuirons ja la coste de cel mont,[7]
Ou nos nos rendrons pris ; ne sai lequel façons.
Ki son cors puet garir, c’est bele raençons. »
Segnor, ce dist Renaus, tot estes traïtor ;
Mais par icel apostre c’on quiert el pré Noiron,
Se dame Dex ce done, ki vint à pasion,
Que nos de cest peril escaper peüsson,
Trancerai vos les testes par desoz le menton. »
- ↑ 6774 L a.
- ↑ 6776 Manque à Metz.
- ↑ 6777 L d’un pere répété au vers suivant. B Metz : tout frere.
- ↑ 6785 L pecié. B M pitié. Metz : grant pechié ai de vos.
- ↑ 6789-6790 Metz : Aideres nos vos or, li visquens d’Avingnon, Gaimars de la Sajete, Hunaus de Taillebore, Antoines li visquens, vos et li dus Raimon ? Segnor franc chevalier, et ja conduisies nos.
- ↑ 6791 L nos en. B Metz : ne nous en.
- ↑ 6793 L M Metz ja.
