« Frere, dist Aallars, et nos que atendon ?
Bien a mort, deservie hom ki fait traïson. »
Renaus point le mulait des trançans esperons
Et a traite l’espée dont à or est li pons,
Et vait ferir premier le conte d’Avignon.
Ce fu cil ki dona conseil au roi Yon
Et ki plus li loa la mortel traïson.
Renaus le feri si, li fix au viel Aymon,
Que tot le porfendi desi que el pomon ;
A ses piés l’abat mort devant lui el sablon.
Li autre vont fuiant entor et environ,
Et Renaus point et broce le mulet arragon ;
Mais il nel pot porter, ains li ciet el sablon,
Car tant fu grans Renaus, .xv. piés ot de lonc ;[1]
Encor est à tiesmoing la fierte del baron.[2]
Renaus cheï à terre del mulet arragon,
Lor regrete Baiart, son destrier misaudor.
« Hé, Baiart, bons cevax, que je ne sui sor vos !
Et puis si fusse armés de mes meillors adous,
Molt me vendisse chier ains que mort i fussons. »
« Frere, ce dist Guichars, por Deu, où garrons nos ?
Venir voi nostre mort, ja voir n’en estordron,
Car je voi ci venir Fouque de Morillon,
L’ome ki plus nos het de trestos ceus del mont.
Ves le ci où il vient, le trait à .i. boujon.
Renaus, biaus tres dous frere, por Deu et por son non,
Car faites une chosse que nos vos loeron,
Que nos passons cele ewe, ja à nos ne venront,
Et montons sor cel tertre, sor le coing de cest mont. »[3]
« Wa, fols, ce dut Renaus, tu me tiens à bricon.
Mules ne puet fuir vers destrier aragon.
Miex vaut [mors] à honor que vivre à deshonor.[4]
Qui en fuiant morra, ja n’ait s’ame pardon. »
- ↑ 6814 Ce vers et le suivant font tache dans ce beau drame. Renaud n’est pas un géant. B écrit XL.
- ↑ 6815 J’ai lu tiesmoing dans L et M. B Metz donnent Tresmoigne.
- ↑ 6829 Metz ajoute : Certes c’est bone fuite qui trait à garison.
- ↑ 6832 L morir (une syllabe de trop). M mort à henour que recreant morrons. Metz : Mex vault mors à onor que recreans vivon.
