« [Amis, ce dist Renaus, por Dieu et por son non,][1]
Moi et vos [somes] frere, preis nos apartenon ;[2]
Jamais ne vos faudron tant com vivre puison. »
« Sire, dient li autre, et nos vos aideron. »
Et Renaus les baisa par merveilleuse amor.
« Aallars, dist Renaus, se armes eüson,
Nos n’en vaussissiens mie .iiii. ne .v. ne .ii. ;
Encor en vausissiens .cccc. des meillors. »
Il cria Montauban et Guichars Balençon ;[3]
Aallars, saint Nichole des plains de Walcolor,
Que il face as enfans et aïde et secors.
Richars crie Dordone, ce fu l’ensaigne Aymon.
Hé Dex ! queles ensaignes escriées i ont !
S’il eüssent o eus .cccc. compaignons,
Desconfit les eüssent, ja n’en alast .i. sous.
Fouques cria s’ensaigne, icil de Morillon :[4]
« Par Deu, traïs vos a li riches rois Yons.
Encui perdres les testes, ja n’aures raençon,
Que je vos lacerai el col le chaieinnon.
Si m’aïst Dex, Renaus, or iestes vos embrons ;
Or iestes vos venus à vo confusion ;
Or vos [est] eslongiés Maugis li fors larons ;[5]
Or cort Baiars trop lent, ne l’aves mie o vos.
A tort l’aves changié à mulet arragon.
Mar veïstes la mort Bertolai le baron,
Le neveu Charlemaigne, le roi de Montloon.
Et que feres vos ore, Renaut li fius Aymon ?
Desfendres vos ore ou vos rendres prison ?
Ne vaut vostre desfense le pris d’un esperon.
Je vos ocirrai tos, ja n’aures raençon. »
« Certes, ce dist Renaus, vos parles en pardon.
Ençois estera Chartes droitement à Soison,
- ↑ 6864 Pris de M.
- ↑ 6865 Somes manque à L. B M sommez.
- ↑ 6872-6876 Metz : Montauban escria Renaus li fiex Aymon Et Guichars Vairepene et apres Balenchon ; Aalars S. Nichol des plains de Valcolor. Richars crie Dordone, ce fu l’ensaigne Aymon. Hé Dex ! queles banieres escriées i ont !
- ↑ 6879 B crie Monjoie.
- ↑ 6885 Sic M Manque à L. Cf. 7280.
