Je ne voldroie ja en bone cort nul jor,
Au doi ne me mostrassent et Normant et Breton,
[Et diroient entr’eus li grant et li menor : ][1]
Ves là Renaut le duc, le fil au viel Aymon.
Charles pendi son frere au puis de Montfaucon.
Certes, ce dist Renaus, com ci a mal sornon ;
Certes miels vol morir que apres n’en alons.
Aallart, sives moi, car apres en iron. »
« Sire, dist Aalars, [nos povoirs en feron]. »[2]
L’escu geta à terre Renaus, li fix Aymon,
Le cors abandona, iriés comme lion ;
Ne li caut mais de lui vallant .i. esporon,
Et tint traite l’espée don[t] à or est li pons.[3]
Onc carpentiers en bois ne fevre ne maçon[4]
Ne demena tel noise, tant eüst grant besoing,
Com i fait sor les hiaumes del bon branc de color.
A l’un trança le foie, à l’autre le pomon.
François li firent voie, ou il vollent ou non.
Li melor s’en atargent por Ogier le baron.
Cil se sont regardé ki mainent le prison ;
Com il voient Renaut, si orent grant paor
Et dist li uns à l’autre : « Or revient Finemont.
Ki se laira ocire, ja n’ait s’ame pardon. »
En fuie sont torné, s’ont laissié lor prison.
Dist Renaus Aallart : « Biax frere, que feron ?
Venes ent à Guichart, sans nule arestison.
Deslies li, biax frere, et les piés et les pongs,
Et s[i] li desbendes les bial[s] iols de son front,[5]
Et le faites monter sor .i. ceval gascon,
Le fort escu au col, el poing le confanon ;
Et jo sivrai ces autres ki par deça s’en vont.
Tuit seront desconfit li traïtor felon. »
« Sire, dist Aallars, entendes ma raison.
Je di certainement, se nos nos departon,
Page:Castets - La Chanson des quatre fils Aymon, 1909.djvu/515
Le texte de cette page a été corrigé et est conforme au fac-similé.
487
les quatre fils aymon
