Se vos nes poes prendre, molt nos mervellerons. »
Et respondent François : « Et nos les assaurons. »
Ogiers se trais[t] ariere le trait à u[n] bougon,[1]
Et tire ses cevex et maine grant dolor ;
Regrete son neveu, Renaut, le fil Aymon,
Et Aallart l’ainé et Richart le menor :
« Cosin somes germain, pres nos apartenon ;
Mais tant fort sui aclin vers mon segnor Charlon,
Ke ne lor puis aidier ne valoir .i. bouton,
Dont je sui si dolens, à poi ke je ne font. »
Se la geste ne ment, Ogiers se faint le jor ;
Trestuit fussent il pris, ou volsissent ou non,[2]
Mais Ogiers les detint par plait et par sermon,
Car cuers ne puet mentir, pieça que le dit on.
.iiii. costes avoit en la roce Mabon ;
A cascune asalloient .c. chevalier baron.
Renaus avoit les .ii. à desfendre tos sols.
Et Richars jut navrés amont sor le peron,
Il ne lor puet aidier ne faire nul secors.
Aallars fu navrés del dar à un geldon,
Tres tot droit en la quise, desore le genol.
Tant est afebloiés qu’il ciet à genelon.
« Frere, dist Aallars, por Deu, quel le feron ?
Ne voi mais nul secors ; car nos rendon prison. »
« Frere, ce dist Renaus, por Deu, que dites vos ?
Vos estes tos li graindres et li aisnés de nos.
De vos deüst venir vaselage et socors,
Et vos estes li pires, ja nel vos celeron.
Une riens vos dirai, que je sai à estrous.
Se cuidoie garir por or et por mangons,
Por castiel ne por terre ne por avoir el mont,
Je me fuse rendus, tres hui matin, prison.
Mais nos savons molt bien qu’avoir ne raençon
Page:Castets - La Chanson des quatre fils Aymon, 1909.djvu/524
Apparence
Cette page a été validée par deux contributeurs.
496
les quatre fils aymon