Ki estoit en la roche destrois et angoisous.
Il a gardé sor destre, el bos de Colençon ;
Droit vers le Serpentine, choisist .m. compaignons.
Il les conut molt bien, quant il vit lor adous ;
El premier chief devant Maugis, le bon larron,
Ki seoit sor Baiart, le destrier arragon.
Baiars ne venoit mie le pas ne le troton,
Ains se venoist plus tost que nus esmerillon,
Au menor saut qu’il fait, .xxx. piés el sablon.[1]
Quant Renaus l’a veü, tel joie n’ot nus hom.
Il a dit à ses freres : « Or ne nos esmaion.
Ne sai qui l’a conté Amaugis le larron ;
Ves le ci où il vient sor Baiard l’arragon.
[Toz l’orgueil de Gascoingne vient ci à esperon].[2]
S’or ierent Franc .xx. mile, n’en estordroit .i. sous. »
« Hé Dex ! dist Aallars, aurons nos donc secors ? »
« Oïl, ce dist Renaus, ainc plus gent ne vit hom,
[Car bien sunt .xv.m. de chevaliers baron. »][3]
Et Richars l’entendi, qui jut sor le perron,
Ki tos iert amuis et perdoit la raison.
Si entent la parole, com fust avision ;
Lors a levé le chief belement contremont
Et apele Renaut à molt basse raison.
« Or vos oï nomer Maugis, le fort larron.
Ce me fu or avis ou ce fu avisiom ? »
« Par foi, ce dist Renaus, orendroites l’aurom. »
« Frere, ce dist Richars, por Deu, monstres le nos.
Certes se jel veoie ençois que morusom,
M’ame en iroit plus lie devant nostre Seignor. »[4]
« Frere, ce dist Renaus, nos le vos monstreron. »
Il le prit par l’aisele, sel leva contremont.
Quant Richars vit Maugis, si grant joie n’ot hom ;
.iiii. fois se pasma, ainc ne dit o ne nom ;
Et quant fu revenus, si dist fiere raison :
Page:Castets - La Chanson des quatre fils Aymon, 1909.djvu/535
Apparence
Le texte de cette page a été corrigé et est conforme au fac-similé.
507
les quatre fils aymon