« Si furent, par mon cief ; cil i furent trestot.
Molt i furent destroit li .iiii. fil Aimon
Et plaié et navré et forment anguissos.
Ja nus n’en fu destors por nul avoir del mont,
Se par Maugis ne fust ki lor fist gent socors.
Là i fu premiers mors Fouques de Morellon,[1]
Il et Guimars li cuens et Fauc de Monjançon.
Et que feroie ci plus lonje aconttison ?
Tuit firent desconfit, François et Bergoignon,
Et Flamenc et Englois et Normant et Breton,
Ne Ogiers li Danois s’enfui à bandon. »
« Ahi ! las dolerox, ce dist li rois Yon,
Se je atan Renaut, le nobile baron,
Ne Aallart l’ainé ne Richart le menor,
Ne Guichart le cortois ne Maugi le laron,
Bien sai k’i m’ociront, ja n’aurai garison ;
Ne me garra castiaus, fremetés ne donjon.
Certes ce sera drois, n’i aura mesprison.
Bien m’orent encanté Pilate[s] et Noiron,[2]
Qant por paor de mor traï itex barons.
Ahi ! seror Clarise, hui departirons nos.[3]
Jamais ne me veres ne je ne verai vos.
Hui vos guerpi Gascoigne, jamais n’i enterron. »
Puis escrie ses homes, hautement, à cler ton :
« Isnelement, lor dist, montes à esperon ;
Ne vestes pas haubers ne vos hiaumes reons,
Ne ceignies vos espées à senestres gierons,
Ne menes palefrois ne mules aragons,
Mais bons cevaus corans, les meleus que avons,[4]
Se ce vient au besoing, que bien fuir puisson.
El bos de la Serpente prendrons herbercison,
A une grant abeie del cors saint Laseron ;[5]
Moines i a prodomes, de grant relegion.
Page:Castets - La Chanson des quatre fils Aymon, 1909.djvu/556
Apparence
Le texte de cette page a été corrigé et est conforme au fac-similé.
528
les quatre fils aymon