Aallart, menés l’une, vos iestes li ainsnés,
Et [Guichars] menra l’autre, el nom de dame Dé,[1]
[Richars] menra la tierce, si l’avons atiré.[2]
[I]l se tendra o moi, car trop est desreés,[3]
Trop est hardis et preus por premiers assembler.[4]
Angelier de Gascoigne la quarte bailleres,[5]
Car à meillor de lui baillier ne la poes.
Angeliers, dist Renaus, molt iestes alossés.
Vos savez plus de guerre que nus hom qui soit nés ;
Or me gardes m’onor et mon droit maintenes.
A dant Girart de Blaives la quinte livreres.
Li baron de Gascoigne me doivent molt amer,
Car onques n’en vos i. laidoier ne blasmer. »
« Sire, ce dist Girars, vos dites verité.
[J]e ne vos faudrai ja en trestot mon aé. »[6]
« Par mon chief, dist Renaus, je vos rendrai le gré.
Et vos, cousins Maugis, la siste guieres.
Vos remenres derriere, l’arriere ban feres ;
Se mestier en avons, et vos nos secorres. »
« Sire, ce dist Maugis, trop poes sermoner.
Faites delivrement, car trop i demores,
Que puissons à Rollant, à Olivier joster. »
« Cousins, ce dist Renaus, or aves dit que ber ;
[E]ncor n’ai meillor [frere] quant tu ies bien armés.[7]
[Et] je menrai la sepme, ainsi l’ai esgardé,
[D]evant chevaucerai à .iii.m. d’adobés
Por l’orgueil de Rollant que volrai encontrer. »
Aallars et Guichars le courent acoler.
« Merci, frere Renaut por sainte Charité ;
- ↑ 8806 L. Richars. M B. Guichars.
- ↑ 8807 L. Guichars. M B Richars.
- ↑ 8808 L’initiale manque.
- ↑ 8809 M Trop est hardi Richars. Tout cela s’applique mieux à Richard.
- ↑ 8810 Pseudo-Turpin, c. XI, dans la liste des chefs de l’armée de Charlemagne : Engelerus dux Aquitaniæ, cum quatuor millibus virorum bellatorum : isti erant docti omnibus armis, maxime arcubus et sagittis. etc. Ce personnage figure déjà dans la Chanson de Roland, mais le trouvére. ici paraît s’inspirer de la chronique latine.
- ↑ 8819 Initiale rognée, ainsi qu’à d’autres vers plus bas.
- ↑ 8828 Sic M B. L meillor quant.
