Voles vos donc vos freres à .i. seul cop tuer ?
Trop par est preus Rollans por ses armes porter.[1]
Ja nel puet on en char ne blecier ne navrer.
Asses i a des autres, laisies Rollant ester. »
« Segnor, ce dist Renaus, plaist vos à escouter.
Bien sai que il est preus, ainc ne vit on son per ;
Mais j’ai droit et il tort, qui bien li puet grever.[2]
Au bon droit que je ai, ne le quier eskiver.
S’il weut pais et mesure, bien le porra trover,
Et se il veut bataille, [je] li porrai livrer.[3]
Je weil miels tost morir que longhement pener.
Seignor, ce dist Renaus, tot çou laisies ester.
Les galos et le poindre n’ai soing de desreer.[4]
Si vos tenes ensamble, le petit pas serré,
Que li .i. ne part l’autre .i. andain mesuré ;
Et si portes enbrons les vers helmes gemés
Et tenes devant vos vos espiés noielés,
Car François vos volront as premiers cos passer
Et il sevent molt bien lor anemis grever.
Mais vos seres preudome et bien vos desfendres. »
Et il ont respondu : « Vos aves bien parlé. »
Ki donc veïst lor gens rengier et ordener,
Et joster les batailles, les eschieles serrer ;
Se preïssies .i. gant qui fust à or parés,
Sel getissies d’en haut sor les helmes gemés,
Ençois poïssies estre demie liue alés
Que il cheïst à terre, tant estoient serré.
Rollans les conut bien et Oliviers li ber.
« Seignor, ce dist Torpins, Renaut poes viser.
Onques ne fu en terre li siens paraus trovés.
Plus set Renaus de guerre que nus hom ki soit nés.
Hé Dex ! où prent il ores çou que il a assemblé,
- ↑ 8835-8836 On peut entendre que Roland est invulnérable grâce à son armure. Le second vers est peut-être une addition. Tous deux sont dans L B M qui représentent l’ensemble des versions.
- ↑ 8840 Cette pensée revient souvent. Là est le ressort moral qui soutient Renaud, là est la justification des vassaux révoltés contre Charles.
- ↑ 8843 L li porrai livrer. B bien l’en porrai. M asses l’en cuit.
- ↑ 8846 M ne vueil pas oublier.
