Desconfis est Rollans, forment en est embrons.
Ogiers de Danemarche l’en a mis à raison.
« Rollant, ce dist Ogiers, gentius fius à baron,
Qui vos a si troé vostre escu à lion ?
Qui vos a desrompu cel auberc fremillon ?
Qui vos a embarré cel vert hiaume reont
Et navré vo destrier le cuise et le crepon ?
Il a just à senestre, ce me samble, el sablon,
Et vos costes ausi, bien pert au peliçon.
Je cuit que vos trovastes Renaut, le fil Aymon.
L’aves vos or ocis, ou il vient en prison ?
Ce ne sunt mie lievre à fuir par sablom. »
Quant Rollans l’entendi, à poi que il ne font ;
De maltalent et d’ire rougist comme charbon
Et a trait Durendal dont à or est li pons ;
Ferir en vost Ogier parmi le chief amont,
Quant Oliviers li tost et li bers Yudelons.
Là les ont departis, ou vossissent ou nom.
Oes quele avanture avint as fius Aymon.[1]
Atant es vos Richars, [li menor, ce savon] ;[2]
A haute vois escrie à Rollant le baron :
« Laidement en ales, Rollant, li niés Charlon ;
Car faites une joste, nos vos en semonom. »
« Vasaus, ce dist Rollans, ja ne vos en faudron.»
Il brocent les chevaus des tranchans esperons ;
Grans cols se vont doner es escus [à lion][3]
Desor les bocles d’or les fraingnent à bandon.
Les lances sunt froisies, s’en volent li tronçon ;
Es escus sunt remes li vermeil confanon.
Illuec fu abatus Ricars, li fius Aymon.
Mais tost resailli sus à guisse de baron.
- ↑ 9323 Cette aventure formera un long épisode, très habilement composé, le plus dramatique après celui de Vaucouleur. L’histoire s’y renouvelle en raison du péril que court l’imprudent qui a osé défier Roland, et du conflit violent entre Charlemagne et ses barons, mais l’on descend de la région héroïque, car sans l’art de Maugis, sans le cheval faé, Richard finissait au gibet.
- ↑ 9324 Sic C. L répète li fius au viel Aymon M le menor, chen dit on.
- ↑ 9330 L à bandon, pris du vers suivant. M à lion.
