Car maint tres biau miracle a Jhesus fait por vos. »[1]
« Sire, dient François, por Deu taillies li donc. »[2]
« Volentiers, dist li rois, par le cors saint Simon. »
A genoillons se met l’emperere Charlon ;[3]
Puis a pris .i. coutel, si desfait le paon ;
Puis a pris .i. morsel, si fist beneïçon.[4]
« Paumier, œvre la bouce et nos le te donron. »[5]
Maugis œvre la geule à guisse de grifon[6]
Et Charles li mist ens le morsel à bandon.[7]
Sachies qu’il n’i failli, se molt petittet non,
Que Maugis ne le prist as dens par le doiton,[8]
Et dist entre ses dens, que ne l’entant nus hom :
« Haï ! c’or ne me vois, Renaus, li fius Aymon !
Mon anemi mortel qui plus me het el mont,
Fas estre devant moi ici à genoillons,[9]
Où il me sert ici et taille mon paon. »
A iceste parole que nos ci vos dissom,
Entra Rollans el tref, il et si compaignon,
Et tint par le blanc doi Richart, le fil Aymon.[10]
Oliviers et Ogiers l’en ont mis à raison
Et Names à la barbe et li bers Yudelon.
« Ahi ! font il, Rollant, entendes envers nos,
Haes vos si de mort les .iiii. fius Aymon,
Que vos voles livrer Richart l’empereor ?
Certes, se li rendes ce sera grant dolor.
Jamais jor de nos vies ne serons bien ne vos. »
« Seignor, ce dist Rollans, voirement li rendron.[11]
Si dirons Charlemaigne que c’est autre prison
- ↑ 9647 M tres bel.
- ↑ 9648 M metes li dont.
- ↑ 9650 M Devant Maugis se mist le roi à genoullon.
- ↑ 9652 M Et coupa le.
- ↑ 9653 M et nous l’i bouteron.
- ↑ 9654 M Maugis bée la bouche en.
- ↑ 9655 M ens par bone entencion.
- ↑ 9657 M ajoute : Paumier, bonnez dens as, chen avoit dit Kllon. Et Maugis s’en est ris dedens son caperon, Et dist.
- ↑ 9661 M Fes estre.
- ↑ 9665M par le bras destre.
- ↑ 9673 M et nous le vous rendrons. Metz : que voles que faiçon ?