Page:Castets - La Chanson des quatre fils Aymon, 1909.djvu/635

607

les quatre fils aymon

Si li ferma Renaus el col le caaingnon ;^[1]
Il meïsmes ses cors le trait encontremont
10625Et .xv. de ses drus que Charles amoit mont.
« Frere, ce dist Renaus, cist garderont les mons.
Çou seront li ostage que nos lairons Charlon. »
Renaus descent à terre des forces contremont
Et vait baisier Richart la bouce et le menton.
10630Maugis et Aallars et Guichars li baron
Le baisent et acolent entor et environ ;
Molt demainent grant joie de Richart au poil blont.
Or resunt assemblé li .iiii. fil Aymon.^[2]
« Renaut, ki t’esveilla ? dist Maugis li larron.
10635Dormis tu quant Ripeus fist ceste traïson ? »
« Oïl, ce dist Renaus, si ait m’ame pardon. »
« Et ki vos esveilla ? » — « Baiars, mes arragons. »
« Hé Dex ! ce dist Maugis, biaus peres glorious,
Maint bien nos aura fait Baiars li arragons. »
10640Lors l’acolent et baisent chascuns par contençon.
« Seignor, ce dist Renaus, et comment le ferom ?
Bien nos est encontré, merci Deu et son nom,
Quant nos avons Richart sain et sauf de prison.
Alons à Montauban brochant à esperon,
10645Si confortons ma fame et mes .ii. enfançons.^[3]
Si mangerons à joie pain et char et poisons
Et si ferons justisse del traïtor Yon.
Ne remest mie en lui que pandu ne fusson.
Dusques à lendemain illuec reposserom,
10650Que nos requerons Charle à .x. mil compaignons,
Et monstrerons le roi que mie ne l’amons.
Ça dedens Montauban .ii. mil en laiseron
Ki nos feront secors, se mestier en avon. »
« Par foi, ce dist Richars, issi pas nel ferom ;
10655Car vos ne saves mie le duel ne le tristor
K’il a eü por moi au tref l’empereor.

1. 10623-10627 Ce trait de barbarie rappelle Ulysse punissant les servantes infidèles.
2. 10633 Que d’angoisses sont résumées dans ce mot !
3. 10645 L saint.