Et a traite l’espée qui li pent au costé.
Oliviers trait la siue qui molt fait à loer.
Li .i. ne vit preu l’autre, car li jors fu alés.
« Par foi, dist Oliviers, s’en prison ne venes,
Je vos toldrai la teste, ja n’en ires par el. »
« Comment avez vos nom ? dist Maugis li senés.
Se vos n’iestes preudom et de haut parenté,
Ja par vos ne serai ne conduit ne menés. »[1]
« Par foi, dist Oliviers, aparmain le saures.
Oliviers de Viane sui par nom apelés. »
Quant Maugis l’entendi, sel reconut assez.
« Sire, ce dist Maugis, gentius Frans honorés,
Je me randrai à vos sor vostre loialté.
Que ne me rendres mie à Charlon l’aduré.
Se me randes à lui, je sui mors et finés,
Et pandus par la geule, comme lerres provés. »
« Par foi, dist Oliviers, ja ainsi n’en venres ;
Je vo rendrai à Charle ains que jors soit finés.
Ne l’oseroie mie à mon seignor celer. »
« Sire, ce dist Maugis, sor vostre loialté
M’en irai apres vos, quel part que vos volres ;
Car je ne vos puis mie, ce m’est vis, sormonter. »
Il le fist errament sor .i. ceval monter ;
Dolant et correcié l’en a o lui mené.
Isnellement et tost en sunt venu as trés.
Or dirons d’Aallart et de Renaut le ber,
De Guichart, de Richart, le vaillant baceler,
Qui porte l’aigle d’or que il a conquesté.
Il ne le rendist mie por .m. mars d’or pesés.
« Renaut, ce dist Richars, or avons conquesté.
Nos avons tel eschec, la merci Dame Dé,
Dont Charles iert dolans en trestot son aé. »
« Voire, ce dist Renaus, bien furent escrié.
Plus en avons de .c. ocis et afolés. »
« Hé Dex ! dist Aallars, où est Maugis alés ? »
« Par foi, ce dist Guichars, ne sai où est remés. »
« Seignor, ce dist Richars, mar vos esmaieres.
- ↑ 11194 B ne conquis ne matez. A ne vaincus ne matez.
