« Renaut, li fix Aymon, or avez trop alé. »
Atant es vos Ogier qui vient tos abrievés,
Rollant a escrié comme hons aïrés.
Ogier ne donna garde, s’oï Renaut huchier :
Hé ! traï nos avez et Naimon et Ogier.
Or se tornent atant poignant vers l’olivier.
Olivier va poignant d’autre part par les biez,
Si soprenent Renaut, ne se set consillier,
Certes si qu’il ne puet monter sor son destrier.
Estolz, traï m’avez, dist Renaus al vis fier,
Que ne se garroit mie de si fait encombrier.
C’est voirs, ce dist Torpins, ne le poons noier ;
Mais ja ne vos fauron, jusc’as membres trenchier.
Atant vint Olivier à tout mil chevaliers,
Et escrie : Renaut, rendez vous prisonier.
Gardez que voles faire, dist Renaus, Olivier.
Or ves doit remenbrer d’un guerredon moult fier
Que vos fiz soz Dordone, dejoste le gravier,
A .iiii.m. François quant m’alastes gaitier
Et je m’en issi fors à tot .m. chevaliers.
Abatu vos avoit Maugis ou sablonier
Entre lui et Guichart et Aalart le fier.
Je vos fi remonter et rendi vo destrier.
Por ice guerredon me devriez aidier.
Sire, dist Olivier, par le cors .S. Ligier,
Ce que vos ai trové me fait moult corecier.
Il n’a si vaillant home de si à Montpellier,
Se il mal vos faisoit, ne me faisoit irier.
Ez vos Rollans, si commence à huchier :
Renaus, li filz Aymon, moult poes chevauchier.
Encor chevaucherai, dist Renaus al vis fier.
Rollans, ce dist Ogiers, gardez, ne le tochier,
Que par la foi que doi Charlemaigné au vis fier,
Je ferai ja mes homes et serrer et rangier.
Qui assaurra Renaut, je li voirai aidier.
Rollans, dist Oliviers, bien le poez laissier.
Ja me fist i. servise qui fait à mercier.
Por la moie amisté, Charlemaigne en pries.
Recevez en l’espée, dist Rollans li guerriers,
Si an viegne à prison, ce ne poons laissier.
Sire, au tref l’enmenez, dist Naimes de Baivier.
Si orra de votre oncle com vodra esploitier.
Se si nos a traïs, moult nos puet anoier.
Contre le roi irons à tot .m. chevaliers.
Le v. 31 n’a que dix syllabes. Le cas est fréquent dans cette version.
