Renauz fu à genolz, si commence à crier.
« Merci, dist il, danz rois, laisse nos acorder,
Por icele pitié et por icel plorer,
Que fist la mere Deu, quant el le vit pener,
Et son biau cors percier et le sanc avaler.
Sire faisomes pes, les mors laissons ester ;
Et se il ne puet estre, Dex nel vœlle endurer,
Qu’il ne laist envers moi vos ires pardoner,
Si laissiez, rois, mes freres envers vos acorder ;
Qu’il eüssent lor terres, si com lor autre per.
Montalban vos rendrai que je ai à garder,
Et mon destrier Baiart ki tant fait à loer ;
Et puis voldrai le regne à toz jorz forsjurer.
Toz nus piés et en lange m’en irai oltre mer,
Et Maugis avœc moi, que je puis tant amer ;
Et servirons au Temple bonement, sans fauser. »
Charlemaignes l’entent, le cief prist à croller,
Et les dens à estraindre et les œlz à torner.
Sa main mist à son cief, si commence à jurer
Par icele corone que il devoit porter,
Ne par trestoz les Sains c’on devoit aorer :
« Se tot li hom del mont ke l’on peüst trover,[1]
M’en venoient prier por cestui acorder,
N’en feroie por aus le monte d’un disner,
Se Maugis ne me rens, ke je ne puis amer ;
Trencerai li les membres et le ferai burler. »
« Ha ! rois, ce dist Renaus, or oi le mot amer.
Je me lairoie ançois à cevax traïner
Que je Maugis vos rende à faire decolper.
« Sire, ce dit Renaus qui toz jors s’umelie,
Comment rendrai Maugis, por Deu le fil Marie ?
Maugis est mes secors, m’esperance et ma vie ;
Mes escus et ma lance et m’espée forbie,
Mes pains, mes vins, ma charz et ma herbergerie,
Mes serganz et mes sire, mes maistres et ma [guie],[2]