Qant ont parlé entr’aus laienz à un consel,
Rollans a creanté et Naimes li feoil
Et Ogiers et Torpins ki sunt de grant consel ;
Volentiers s’en iront et font lor aparel.
Quant les seles sunt mises et pris sunt li consel,
Atant ez la duçoise ki le vis ot vermel,
Rollant a acolé et Ogier son parel
Et Naimon et Torpin ki sont de grant consel.
La duçoise parla o le fresce color.
« Seignor baron, dist ele, por Deu le creator,
Pensez nos d’afaitier envers nostre seignor.
En non Deu, il a tort, ce sevent li pluisor. »
« Dame, ce a dit Naimes, ne soies en freor,
Que la paiz i metronz, se Deu plaint, ainz tierc jor. »
Atant montent François, ne sunt mie à sejor.
Li conte les convoient belement par dolçor ;
Quant il sunt à la porte, adonques font retor.
Charles les vit venir de son tref le greignor,
Et il et si baron ki n’erent en error.
« Hé, Dex ! dist l’uns à l’autre, beax pere criator,
Or voi venir Rollant lui et le poigneor. »
« Voire, dist Charlemaignes, Dex lor doinst deshonor :[1]
Laissié m’ont por Renaut [qui est mon traïtor.] »
Atant ez les barons, si ne firent sejor.
Es prez sunt descendu belement, sanz freor ;
Errant entrent el tref où est l’empereor.
A genolz se sunt mis belement, sanz demor.
A genolz se sont mis par devant Charlemaigne.
Naimes parla premiers li bons [dus d’Alemaigne].[2]
« Merci, dist il, danz rois, por les Sains de Bretaigne,
Pardones nos vostre ire, que en vos ne remaigne.
Si laisserons Renaut et lui et sa compaigne.
N’en aura mais aïde le pris d’une castaigne.[3]
Quant à lui en alames sor les cevax d’Espaigne,