Comment ala lassus et par con fet apel,
Et se la paiz est faite et caüz li revel ?
« Nenil, dist Charlemaignes, ki descent del poutriel.
Par icel Dameldeu ki forma Daniel,
Ja jor ne ferai pais por dit ne por feel,
Se je n’en ai Maugis, s’en prenderai le pel. »
Puis conta à ses homes belement, sanz fablel,
Comment [et] quel manere fu portez au castel.[1]
Or est Charles en l’ost qui peor a eü ;
Si home li demandent, ki à lui sunt venu,
Se il vit puis Rollant ne duc Naimon son dru,
Ne Ogier ne Torpin ki se sont irascu.
« Oïl, dist Charlemaignes, mais del tot m’ont faillu.
Por Renaut m’ont laissié, bien me sui perçeü.
Par icel Dameldeu ki en crois fu pandus,
Se nul en puis tenir, mal li est coneü.
Je le ferai destruire, ki qu’en soit irascu. »
Molt manace li rois, mais il en ert vencus.
Or fu Renaus lasuz et avœc lui si per.
Là où il vit Rollant, sel prist à apeler
Et Naimon et Ogier et Torpin l’ordené.
« Seignor baron, dist il, je vos vœl commander.
Alez à mon seignor que Dex puist amender.
Ne vœl qu’il se corost por vos cors agrever.
Des pleges vos claim quite, mar en estuet doter. »
Quant Naimes l’entendi, sel corut acoler ;
Bonement l’en mercie, au pié l’en volt aler.
Renaus nel pot [soffrir], prent l’en à relever.[2]
« Rollant, ce a dit Naimes, pensons del retorner. »
« Commant le ferons nos ? ce dit Rollans li ber.
Si laisserons Renaut con velt à tort mener. »
« Sire, ce a dit Naimes, plaist vos à escouter.
Quant serons o le roi ki France a à garder,
Plus li porons valoir por faire racorder.
Tost se porpensera, si laissera ester ;
Tost en sera vencus, ki li voldra mostrer. »
