La nuit i sejorneront à joie liement.
Lendemain vont à cort tuit par commandement ;
N’i remaint duc ne conte qui ait haut tenement,
Evesque, n’arcevesque, ice vos di briement.
Charles vi ses barons, molt grant joie l’en prent ;
Il se leva en piés, si parla hautement.
« Seignor baron, dist il, entendez mon [samblant].[1]
Assis ai Montalban par mon esforcement ;
Par icel Dameldeu ki nos fist de noient,
Ja n’en me tornerai por or ne por argent,
Si aurai pris Renaut, le traïtor pullent,
Et Allart et Guichart et Richart ensement.
Tant sunt ja afebli, ne valent mais niant.
Maugis s’en est fuïz, c’est lor efforcement ;
Ne porront pas fuïr, ce sacies durement.
Là suz a poi vitaille et si a molt poi gent. »
Quant li baron oïrent si Renaut manecier,
Assez i ot de celz cui il pot anuiier.
[Dus] Naimes de Baiviere en a parlé premier.[2]
« Sire, drois emperere, dit li drois consellier,
Que ales ci disant, oiant maint chevalier,
Que petit ont lassus à boivre et à mangier ?
Se tant i voles estre, par Deu le justicier,
Qu’il soient afamé par aucun destorbier,
Dont n’i entrerez pas de cest esté premier. »
« Sire, ce dit dus Naimes, s’i vos plaist entendez ;
Car creez mon conseil et si vos reposez,[3]
Que Renaus fist là suz por vos assez bontez :
Ainz mais ce ne fist hom ki de mere fu nez. »
Charles oï duc Naime, si l’avoit regardez,
Bien sot qu’il voloit dire, n’estoit pas trespensez.
Dont se leva toz drois, de grant ire enflamez,
Si roelle les œlz, si a le cief crollé.
Il tenoit .i. baston, de novel fu parez,