Desore s’apuia, à poi n’estoit froez ;
Apres lieve son cief, ses a araisonez,
Et parla fierement com hom desmesurez.
« Par cet Segnor, fait il, qui nos done clarté,
Ne par icele Dame où il fu esconsez,
Il n’a çaianz vassal de si haut parenté,
Si parole d’acorde vers les desmesurés,
Que jamais en sa vie fust ja de moi privez.
Certes, se je les preng, tot seront decolpé. »
Quant si baron l’oïrent, si en furent iré.
Mais il n’i ot .i. sol, saciez de verité,
Qui puis en parlast mot por .m. mars d’or pesé.
Quant oïrent François si parler l’emperere,
Qui manace Renaut et avec lui [ses freres],[1]
Adont n’i ot .i. sol ki puis en feïst ciere.
Cascuns garda vers lui, si ont fait chiere amere.
« Ha Dex ! ce dit Ogiers, basset, à sa voiz clere,
Maudite soit or l’eure de Deu et de sa mere,
Que Renaus ne vos fist le cief de cest but rere ! »
L’emperere est el tref et avec sa maisnie ;
Mais il n’i ot un sol de si haute lignie
Qui consel li donast qu’ensi soit essellie
Cele maisnie Aymon, qui si est asegie.
Mais il jure cel Deu ki soffri la [hascie],[2]
Ja n’en aura manaie, ainz sera graellie.
Erranmant se leva, si fist une hucie :
« Baron, or tot as armes, [n’i ait rene saichie].[3]
Ja sera cele tors, se je puis, damagie. »
François oïrent Charle, si se corent armer.
Là vit on mainte ensegne vers le ciel venteler,
Et les hiaumes lacier et ceindre maint branc cler,
Et tant pic esmolu por le mur entamer,
Et tant fausart agu et tant arme porter.
Si vont vers le castel, qu’il vœllent esseller.[4]
