Fors d’armes et d’escus mais .i. tot seu[l] n’en prist.[1]
Montalbain ont laissié que rois Karlles assist,
Banieres desploiées dont tot lo mur porprist ;[2]
Ains li rois ne sait mot que nus hom s’en issist.
Renaus entre en la bove, demorement n’i quist ;
Droit devant lo premier .iii. cerges porter fist,
Dont il eurent clartei dont nus ne s’en malmist.
Quant il sont arroté, adonc Renaus lor dist :
« Seignor, ce dist Renaus, si m’ait Jhesu Crist,
Male obliée ai faite, ain on tele ne fist.[3]
Le roi Yon laisson, qui en ma chartre gist ;
Certes ne l’i lairoie por quanque Jhesus fist. »
« Renaus, dist la duchesse, par moi i porrisist.
Laissiez lou, s’il vos plaist ; cel domage vos quist.
Renaus torna arriere là où savoit le roi ;
De la prison l’osta, si lo prist par lo doi,[4]
Puis en la bove ancui Yon mist devant soi.
La dame vit Yon, si li [dist] par derroi :[5]
« Frere, mal veignes vos, fet nos [a]s cest annoi. »
« Taissies, ce dist Renaus, tort aves par ma foi.
Ja tant comme ge puisse, ne morra à belloi ;[6]
Que je li fis homage, si li doi porter foi.
Comment que il a fait ne meserré vers moi,
Ne me voldrai ge mie si parjurer vers soi. »
Quant li frere l’oïrent, si crierent tuit troi :
« Renaus, vos dites bien, nus n’est mieldres de toi. »
Puis saisirent Yon qui fu febles en soi ;
Devant aus si l’ont mis, puis [n’i firent deloi] ;[7]
Ain se sont aroté belement troi et troi.
Or s’en vont li baron, si enmainent Baiart ;
[Roi Yon enmenerent Renaus et Aalart ;][8]
- ↑ 13754 L seu. A Fors des hyalmes d’acier mais onques .i. n’en prist. M De hyaumez et d’escus mez onques el ne quist.
- ↑ 13756 Ruse de guerre dont les exemples abondent.
- ↑ 13763 M Male oublianche.
- ↑ 13769 M De la chartre le giete.
- ↑ 13771 L est. M dist.
- ↑ 13774 M comme je vive.
- ↑ 13781 Sic M. L puis i firent derroi.
- ↑ 13784 Sic M. L manque.