Si a molt de lor gent confondue et malmisse.
Molt fu grans li çanbiax de la gent sarrazine,
Crestien [poignent avant], cascuns d’ax i chemine ;[1]
Li bons contes de Raimes i vint de tel ravine,
Sarrazins reüssa vers la cité perrine,
Là ot tante hante fraite de fraine et de sapine,
Tant Sarrazin verssé, qui gisent sor l’eschine.[2]
Joffrois de Nazarel i faissoit decepline ;[3]
Il ne feri sor hiaume de cele gent mastine,[4]
Que il ne lo fandist deci à la pottrine.
Li amiraus lo voit en la chambre lovine ;[5]
Lors dit en son corage, ne se prisse une espine,
Se il ne prent vengance ains la nuit enterine.
Li amiraux de Perse ot molt lo cuer irés
Envers Joffroi le conte qui n’estoit mie an pes.
Il a pris une lance dont li fers fu mauves ;
Vers Joffroi vint poignant, si i fist .i. esles.
Li cuens lo voit venir envers lui à .i. fes ;
Adonc prist .i. espié d’un chevalier Gervais,
Puis vint vers l’amirant qui venoit à eslais.
Cil revient contre lui qui ne quiert mie pais.
Joffroit fiert en l’escu qui fu de bones es,
Son espié i brissa qui estoit de cipres,
Li Joffroi fu entiers qui à envis fu frez ;
Tant com hante li dure, l’abati es mares.
Li amirals verssa à duel et à grevance,
Mais tost resailli sus, que n’i fist detriance,
Et Joffroi li cortois par aïr s’i avance ;
Par lo hiaume lo prent, si li a fait nuissance.
L’amiraus crie Perse, o molt grande puissance,[6]
Et si home i vienent, maint Sarazin s’i lance.
Lor seignor ont resqueus, qui que en ait nuissance ;