Page:Castets - La Chanson des quatre fils Aymon, 1909.djvu/879

851

les quatre fils aymon

17135« Ha ! Renaus, biax dous frere, n’en aies ja freor
Que Grifones i veigne qui a fait son ator.
Mil de nos s’armeront orendroit sans demor,
Et ge les conduirai, en la main l’oriflor,
Ens es pres desos greve ; là referai mon tor,
17140Sus l’aive de Moraine, non pas com boisseor,
Mais tot voiant lo monde, com hom de grant valor.
S’il s’enbatent en Seigne par aucune folor,
D’autre part me ferai, se Dex me part honor. »^[1]
« Richart, ce dit Renaus, ge vos pri par amor,
17145Se il ont la victoire et desus nos l’annor,
Gardes ne lor nuissies, ce seroit deshonor. »
« Avoi, sire, dist il, ja n’en aies paor.
Je nel feroie mie por Inde la major.
Traïtor en seroient trestuit nostre ancessor. »

17150Richarz part de ses freres que n’i fist demorance,
Et Renaus vint à cort tot droit au roi de France.
Quant Charles l’a veü, envers lui droit s’avance.
Entor lui regarda en cascune ordenance,
Quant il ne vit Richart si ot male esperance,
17155A Renaut lo commande qui n’i fist detriance.
« Sire, ce dist li dus, qui devant lui se lance,
Il est en ma besoingne por faire ma plaissance.
De lui n’aies ja garde ne malvaisse dotance. »
« Non ai ge, dist li rois, n’i ai pas abaance,
17160Tant com soies en vie et en vo grant puis[s]ance.^[2]
Alons vers la bataille veoir la cont[en]ance.^[3]
Un[e] tor a sor Saigne à bele deportance,^[4]
Entrés i [monterrons] por veoir la samblance. »^[5]
« Bien dites, dit Renaus, se Damedex m’avance. »

17165Charllemaignes monta et Renaus avec lui,^[6]
Et Torpins l’arcevesque qui que tort à ennui,
Salemons de Bretaigne et l’Ardenois Ti[e]ri,^[7]
Avec fu Guesnelons, Hardres et Aulori,

1. 17143 ferai = ferrai. — Cf. Ogier, v. 2711 sq.
2. 17160 L puisans.
3. 17161 L contance.
4. 17162 L Un tor.
5. 17163 L monterront.
6. 17165 Charllemaignes en toutes lettres.
7. 17167 L Tiri.