Ensi tuit chevauchierent envers la tor Farin.
Renaus se regarda .i. po dessus de li,
Si vit Richart seoir desus .i. arrabi,
S’enseigne tint el poing, l’escu enchanteli ;
Maint vassal vit armé arriere deles li,
.iiii. et .iiii. en aloient trestuit amonceli,
Lor hiaumes en lor poing trestuit erent saissi.
Charlemaignes les vit, si en fu esbahi.
Adonques s’aresta, el palefroi feri ;
Renaut en appela lo bon vassal hardi,
« Comment, dist il, Renaus, aves moi ja menti ?
Ne voi ge là Richart armé et fervesti
Qui est devers Grant Pont, armés aveques li ?
Il vient lo champ enfraindre don il [m’a] molt marri,[1]
Que adonques seroie verai[e]ment traï. »[2]
« Sire, ce dist Renaus, entendes envers mi.
Je vos doie Dex en plege qui onques ne menti,
Que par devers Richart n’iert ja li chans honi,
Se ne saut Grifones, ses mortels anemi,
Qui est soz Saint Marcel en [.i. vergier] flori,[3]
O lui mil chevaliers que l’en lo m’a gehi. »
« Est voirs, dist Charlemaignes, [que] il soit fait issi ?[4]
« Oïl, ce dist Renaus, loaument vos afi. »
Quant Charles ot Renaut que ice li aconte,
Saint Denis en jura que tot ce riens ne monte ;
Salemon apela et de Potiers .i. conte,
Berart de Mondidier qui de bonté sormonte :
« Faites armer .iii.m. de chevaliers par comp[t]e ;[5]
Si passeront en l’is[le] ; leur orguels rien ne monte.[6]
Se il plaist Damedex, ne m’i feront hui honte.
Armés serai o vos que pas ne m’i mesconte.
Par icel Damedex qui desor nus sormonte,
Se il passent en l’isle, torné sont à mal conte.
Nogé seront en Seigne, n’ai garde nus i monte. »