Bras à bras sont au chaple qu’en nes puet contrester
De foïes en autre s’en vont grans coz doner.
Li uns lasse tant l’autre que il ne puet parler.
Or la[i]rons l’un à l’autre tot issiques joster,[1]
Si d[i]ron de lo[r] freres ò il n’a que blasmer.[2]
Costant si tint lo brant qui [luisoit] com or cler.[3]
Et vait ferir Yvon que il voloit grever.
Il failli à son hiaume qu’il ne pot asener.
Si ocist lo cheval, Yvon en fait aleir.
Mais tost resailli sus comme bon bacheler,
Si tint traite Froberge qui ne pot esgrumer.
Costant en vait ferir que il ne pot amer,
Desus la fontenele, ne la puet plus lever.
Li cercles fu tant fors, ne le pot [ampirer].[4]
Par devant lo visage en fist lo branc coler,
La vantaille li fent que il ot fait fermer,
Lo pomel de la face en a fait jus voleir
Del viaire tel piece c’uns chas s’en puet disner ;
Dont li perent les dens, veoir les puet on cler.
Li brans dessent à terre, il n’a soi[n]g d’arester,[5]
Reis a reis de l’arçon n’i laissa que coper,
Tot droit en .ii. tronçons fait lo destrier coler.[6]
Costans chaï à terre ò il n’ot qu’aïrer,
Mais tost resailli sus por sa vie sauver.
L’escu tint [as enarmes], molt se sot bien moller,[7]
Et Yvons li escrie quenqu’il pot escrier :
« Par Dex, cuivers, traïstres, il vos covient finer.
De mau jor nos feïstes de traïsson reter.[8]
Hui est venus li jors qu’il [l’]estuet comparer. »[9]
Page:Castets - La Chanson des quatre fils Aymon, 1909.djvu/892
Apparence
Le texte de cette page a été corrigé et est conforme au fac-similé.
864
les quatre fils aymon