[Moult fu grant la miracle à la messe chantant.
Enterrer le voloit le bon clergié sachant.
Quant vint à l’enterrer le cors Renaut le franc,
Le cors Renaut s’esmut par le Jhesu commant.
Du mostier s’en issi, que le virent la gent].
Quant le vit li evesque, bien [en] fu merveillant :
« Barons, or tost apres, sanz nul arestement. »
A donc sunt aroté li petit et li grant ;
Et li saintismes cors s’en ala de devant,
Droitement vers Tremoine s’en ala cheminant.
Quant fu pres d’une liue, ce trovon nos lisant,
N’out en laiens de cloche qui lors n’alast sonant.
Les eschieles sonerent par la volonté Dé.[1]
Li clergié s’en merveillent par tote la cité.
L’evesque ist de la vile, n’i a plus demoré,
Si encontra le cors enz el chemin ferré.
Li frere Renaut sunt avecques li alé.
L’evesque vint au cors, s’a le paile levé,
Et quant conut Renaut, s’a grant sospir jeté.
A toz comunaument l’avoit dit et conté :
« Barons, franc chevalier, ja ne vos iert celé,
Ic’est le duc Renaut, le nobile chasé ».
Quant li frere l’oïrent, de duel se sunt pasmé.
Et puis l’ont doucement et plaint et regreté :
« Halas ! Renaus, font il, chevalier de bonté,
Comme or somez por vos dolant et esgaré !
Ha ! que porron nos fere, chaitif, maleüré ? »
As oncles de lor mains ont lor vis gratiné.
[Toz ceus qui les regardent, si en ont grant pité][2]
Et li gentil evesque les a reconforté :
« Barons, soies en pes, por l’amistié de Dé,
Quer apres iron tuit, ja n’en iert trestorné. »
Lors portent au mostier le cors beneüré.
Si le mistrent en fiertre par grant nobilité.
Diex fist por li miracles, le roi de majesté.
Saint Renaut a à non en icele regné.
Saingnors, ci faut l’estoire donc je vos ai conté.
Or proion Dameldeu qui maint en Trinité,
Qu’il receive nos armes por la soe bonté.
Page:Castets - La Chanson des quatre fils Aymon, 1909.djvu/938
Le texte de cette page a été corrigé et est conforme au fac-similé.
910
appendice
