Et [il] si firent tost que ne si arresterent.
Il vestent les haubers et les elmez lachierent
Et montent es chevaus et chaignent lor espées
Et pendent à lor [cols] les grans targez roées,
Les espius en lor puins, les enseignez fruméez,
Et firent lor attrait dont les fossez raserrent ;
Chevalier et sergant [les eschieles drecierent].
Souvent traient et lanchent, grans en fu l’assanlée,
Franchois furent proudomme et de grant renommée.
As pis et à martiaus lor murs lor effondrerent.
Dedens s’en est entrez Charles nostre emperere,
Et la chevalerie c’ot o lui amenée
Le castel abatirent et [le borc embraserent],
A chiaus qui sont dedens ont les testes copées.
Or pent Dix de Renaut et Marie sa mere
Et d’Alart s’ainé frere et de Guichart son frere,
De Richart le menour et de Maugis le lerre,
Que forment le[s] maneche nostre emperere Karllez.
Entre le pui et l’iaue ont la voie atournée,
Virent de Montauban la tour qui fu quarrée.
Montauban a assis Karllez de Monloon,
Entre le pui et l’iaue tendi son paveillon.
La vitaille lor vient du païs environ.
Pour .i. tout seul denier plus en y douroit on
Que pour .vi. à Paris ou à Rains ou à Laon.
N’i vaut pas demourer Rollans li niez Kallon,
Anchois s’en est tournés à .ii.m. compaignons
Des damoisiaus de Franche, des orgueilleus [garchons]
Et trespasserent l’ost une luée environ
Dessi à Montauban où sont li fil Aimon.
Onques n’i tresfinerent dessi à Balenchon.
L’iaue y est moult petite mais boin est [li] poisson.
Son tref y a fait tendre Rollans li niez Karlon ;
Et tant fu orgueillous que sus mist le dragon.
Franchois se herbegierent entour et environ
Et voient le rivage et de lé et de lonc
Et les camps moult pleniere et lez gens qui y sont,
Et les larges fores où sont li venisons,
L’iaue qui vient bruiant et li guez qu’est parfont ;
Moult estoit bien assise et frumé sor Dordon.
Encor le voient chil qui à saint Jaque vont.
D’autre part court Geronde qui porte lez dromons
Qui porte[nt] les avoirs qui riche et vaillant sont,
Page:Castets - La Chanson des quatre fils Aymon, 1909.djvu/973
Cette page a été validée par deux contributeurs.
945
appendice
