De l’Iſle au Lieure, nous rangeaſmes la coſte du Nort enuiron demye lieuë[1], iuſques à vne poincte qui aduance à la mer, où il faut prendre plus au large. Laditte poincte eſt à vne lieuë d’vne iſle qui s’appelle l’Iſle au Coudre, qui peut tenir enuiron deux lieuës de large, & de laditte iſle à la terre du Nort, il y a vne lieuë. Laditte iſle eſt quelque peu vnie, venant en amoindriſſant par les deux bouts ; au bout de l’Oueſt, il y a des prairies[2] & poinctes de rochers qui aduancent quelque peu dans la riuiere. Laditte iſle eſt quelque peu agreable pour les bois qui l’enuironnent. Il y a force ardoiſe, & la terre quelque peu graueleuſe ; au bout de laquelle il y a vn rocher qui aduance à la mer enuiron demye lieuë. Nous paſſaſmes au Nort de laditte iſle, diſtante de l’Iſle au Lieure de douze lieuës.
Le ieudy ſuyuant, nous en partiſmes, & vinſmes mouiller l’ancre à vne anſe dangereuſe du coſté du Nort, où il y a quelques prairies & vne petite riuiere[3] où les ſauuages cabannent quelques-fois. Cedict iour, rangeant touſiours laditte coſte du Nort iuſques à vn lieu où nous relaſchaſmes pour les vents qui nous eſtoient contraires, où il y auoit force rochers & lieux fort dangereux, nous fuſmes trois iours en attendant le beau temps. Toute ceſte coſte n’eſt que montaignes tant du coſté du Su, que du coſté du Nort, la pluſpart reſſemblant à celle du Saguenay.
- ↑ Par ce qui suit, on voit qu’il faut lire ici dix ou douze lieues : car cette pointe, qui avance à la mer et qui est à une lieue, ou un peu plus, de l’île aux Coudres, ne peut être que le cap aux Oies.
- ↑ Cette partie de l’ile s’appelle encore aujourd’hui les Prairies.
- ↑ La Petite-Rivière a toujours gardé son nom depuis.
