Bien dessert guerdon plantureux
Advis, qui scet si bien servir
Au besoing et trouver loisir,
Maugré Dangier et ses conseulx.
J’ay fait l’obseque de ma Dame
Dedens le moustier amoureux,
Et le service pour son ame
A chanté Penser Doloreux ;
Mains sierges de Soupirs Piteux
Ont esté en son luminaire ;
Aussy j’ay fait la tombe faire
De Regrez, tous de lermes pains,
Et tout en tour, moult richement,
Est escript : Cy gist vrayement
Le tresor de tous biens mondains.
Dessus elle, gist une lame
Faicte d’or et de saffirs bleux ;
Car saffir est nommé la jame
De Loyauté, et l’or eureux.
Bien lui appartiennent ces deux ;
Car Eur et Loyauté pourtraire
Voulu, en la tresdebonnaire.
Dieu qui la fist de ses deux mains
Et fourma merveilleusement.
C’estoit à parler plainement.
Le tresor de tous biens mondains.
N’en parlons plus, mon cueur se pasme
Quant il oyt les fais vertueux
