Page:Charles d Orléans - Poésies complètes, Flammarion, 1915.djvu/288

CHANSON VI.
Dieu, qu’il la fait bon regarder
La gracieuse bonne et belle !
Pour les grans biens qui sont en elle,
Chascun est prest de la louer.
Qui se pourroit d’elle lasser !
Tousjours sa beaulté renouvelle.
Dieu, qu’il la fait bon regarder,
La gracieuse, bonne et belle !
Par deçà, ne dela la mer,
Ne sçay Dame, ne Damoiselle
Qui soit en tous biens parfais telle ;
C’est un songe que d’y penser.
Dieu, qu’il la fait bon regarder !
CHANSON VII.
Par Dieu, mon plaisant bien joyeux ,
Mon cueur est si plain de léesse ,
Quant je voy la doulce jeunesse
De vostre gent corps gracieux !
Pour le regart de voz beaux yeulx
Qui me met tout hors de tristesse,
Par Dieu , mon plaisant bien joyeux ,
Mon cueur est si plain de léesse !
Combien que parler envieux
Souventeffoiz moult fort me blesse.
Mais ne vous chaille, ma maistresse,
Je n’en feray pourtant que mieulx,
Par Dieu, mon plaisant bien joyeux.