Avancez vous, Espérance
Venez mon cueur conforter
Car il ne peut plus porter
Sa tresgreveuse penance.
Pieça, Joyeuse Pensée
S’esbatoit avecques lui,
Mais elle s’en est alée,
Tant a pourchassé Ennuy.
Se vous n’avez la puissance
De tout son mal lui oster
Plaise vous à alegier
Au moins un peu sa grevance,
Avancez vous, Espérance.
Vous lui avez fait promesse
De le venir secourir,
Et de lui tollir tristesse.
Mais trop le faittes languir.
Ayez de lui souvenance
Et le venez deslogier
De la prison de Dangier
Où il meurt en desplaisance ;
Avancez vous, Espérance.
N’avez vous point mis en oubly ?
Par Dieu, je doubte fort, oy,
Ma seule maistresse et ma joye ;
Non pour tant, quelque part que soye,
Je m’attens à vostre mercy.
