<poem style="margin-left:8em; font-size:100%"> Voulez VOUS mon fait savoir? Je suis presque mis en trance, Asourdy de Non Chaloir, Areuglé de Desplaisance. Se le Medicin Espoir, Qui est le meilleur de France, N’y met briefment pourvéance, Vieillesse estaint mon povoir, Asourdy de Non Chaloir.
RONDEAU CCXCVIII. Dedens la maison de Douleur, Où estoit trespiteuse dance, Soussy, Vieillesse et Desplaisance Je vy dancer comme par cueur. Le tabourin nommé Mal Eur Ne jouoit point par ordonnance, Dedens la maison de Douleur, Où estoit trespiteuse dance. Puis chantoient chançons de Pleur, Sans musicque, ne accordance ; D’ennuy, comme ravy en trance, M’endormy lors, pour le meilleur, Dedens la maison de Douleur.
RONDEAU. Par Simonnet Caillau. Dedens la maison de Douleur, Où n’a léesse, ne musique, Mon las cueur gist merencolique. Malade ou piteux lit de Pleur.
