Heureus le serviteur officieus, & dextre
Que le maistre benin au logis treuvera
Faisant sa volonté, quant il retournera
Gouverneur de ses biens il le fera seul estre :
Mais le valet hautain, presumptueus, & traistre
Oubliant son devoir, en soy-mesme dira
Mon-seigneur au logis si tost ne r’entrera,
Sur toute la maison je me veus faire maistre ;
Le maistre en fin retourne, & domtant son orgueil
Le fait precipiter en la maison de dueil,
Ou claquettent des dens les grincemens funebres.
Tel sera du Seigneur l’advenement dernier
Qui jugeant sans appel, envoy’ra prisonnier
L’homme peu vigilant aus maisons de tenebres.
Veillez, mortels, veillez & sur la matinee,
Et vers la fin du jour, soyez en oraison
Puisque vous ne scavez le tems ny la saison
Que la fin de vos jours sera derterminee.
Si le maistre d'hostel scavoit l'heure assignee
Que l'espiant voleur viendra en trahison
Jetter l'huis en dedans, et robber sa maison,
Il ne fermeroit point la paupiere inclinee :
Et vous comme glissons, du sommeil assomme
En sales voluptez tout le jour vous chommez
Songeant au resveiller mille & mille impostures :
La mort vient cependant que vous ny pensez point,
Et vous fait voir à l'œil reduis au dernier point
Que le sage tousjours pense aus choses futures.
