Nous sommes ce nous semble hors de la ville infette
Mais nous n'avisons pas que l'air d'infection,
A desja corrompu nostre complexion,
Et que la peste mesme, en nous mesme s'arreste
Soit dans la noire horreur d'une grotte secrette
Soit par mons ou par vaus, de nostre passion
Nous tourmente & nous fuit, l'aspre contagion,
Qui provenant de nous, de nous mesmes s'alaitte.
Nous chassons bien de nous du monde les appas,
Mais les appas mondains ne nous dechassent pas,
Et l'homme fuit tousjours lhomme eslougné de lhomme
Qui fuyant du prochain le tourment, & le mal
Dont luy mesmes se deut, miserable animal
N'a repos qu'en la mort, asseurance qu'au somme.
Nous nous tirons à part des hommes vicieus,
Mais las avecque nous nous trainons notre vice
L'orgeuil outre-cuidé, l'usuriere avarice,
Et des honneurs mondains l'amour ambicieus :
Nous avons beau changer de lieus plus gracieus,
De chambre ou de logis, par tout ou lon se glisse
Nous gemissons tousjours sous un mesme supplice,
Le ceur & non le lieu nous fait malicieus :
Ce ceur malicieus tousjours nous represente
Les oignons & les aus de l'Egipte abondante,
Et destournant nos yeus du voyage promis
Par tout nous accompaigne ou nostre penser aille,
Nous rangeant à toute heure en nouvelle bataille,
Jusqu'à tant que la mort en seurté nous ayt mis.
