Page:Chrétien de Troyes - Cligès, 1921.djvu/187

Est en Alemaigne remés ;
Et li empereres des Grés
S’an vet mout bauz et mout heitiez.
Cligés li preuz, li afeitiez,
Panse au comandemant son pere.
Se ses oncles li emperere
Le congié li vialt otroier,
Requerre l’ira et proier
Qu’an Bretaigne le lest aler
A son oncle et au roi parler,
Car conoistre et veoir les vialt.
Devant l’empereor s’aquialt,
Et si li prie, se lui plest,
Que an Bretaigne aler le lest
Veoir son oncle et ses amis.
Mout sagemant l’en a requis,
Mes ses oncles l’en escondit
Qant il sa requeste et son dit
Ot tote oïe et escoutee.
« Biax niés, fet il, pas ne m’agree
Ce que partir volez de moi.
Ja cest congié ne cest otroi
N’avroiz de moi, qu’il ne me griet,
Car mout me plest et mout me siet
Que vos soiez conpainz et sire
Avoec moi de tot mon empire. »
Or n’ot pas chose qui li siee
Cligés quant ses oncles li viee
Ce qu’il li demande et requiert.
« Sire, fet il, a moi n’afiert,
Ne tant preuz ne sages ne sui
Que avoec moi n’avoec autrui
Ceste conpaignie reçoive
Ne qu’ampire maintenir doive.
Trop sui anfes et petit sai.
Por ce toche an l’or a l’essai
Que l’an conoisse s’il est fins.