Page:Chrétien de Troyes - Cligès, 1921.djvu/188

Ausi voel je, c’en est la fins,
Moi essaier et esprover
La ou je cuit l’essai trover.
An Bretaigne, se je sui preuz,
Me porrai tochier a la queuz
Et a l’essai fin et verai
O ma proesce esproverai,
Qu’an Bretaigne sont li prodome
Qu’enors et proesce renome.
Et qui enor vialt gueaignier
A ces se doit aconpaignier :
Enor i a, et si gueaigne
Qui a prodome s’aconpaingne.
Por ce le congié vos demant,
Et sachiez bien certenemant
Que, se vos ne m’an envoiez
Et le don ne m’an otroiez,
Que g’irai sanz vostre congié
— Biax niés, einçois le vos doing gié,
Qant je vos voi de tel meniere
Que par force ne par proiere
Ne vos porroie retenir.
Or vos doint Dex del revenir
Corage et volenté par tans.
Des que proiere ne desfans
Ne force n’i avroit mestier,
D’or et d’argent plain.i. setier
Voel que vos an faciez porter,
Et chevax por vos deporter
Vos donrai tot a vostre eslite. »
N’ot pas bien la parole dite
Qant Cligés l’en ot mercié.
Tot quanque li a destiné
Li empereres et promis
Li a maintenant devant mis.