Page:Chrétien de Troyes - Cligès, 1921.djvu/200

Toz estanduz chiet Sagremors ;
Sagremors prison li fiance.
Maintenant li estors comance,
Si s’antrevienent qui ainz ainz.
Cligés s’est an l’estor anpainz
Et vet querant joste et ancontre.
Chevalier devant lui n’encontre
Que il ne le praingne et abate.
D’anbedeus parz le pris achate,
La ou il s’esmuet au joster
Fet le tornoi tot arester.
Ne cil n’est pas sanz grant proesce
Qui por joster vers lui s’adresce,
Einz a plus los de lui atandre
Que d’un autre chevalier prandre,
Et se Cligés l’en mainne pris,
De ce seulemant a grant pris
Que a joste atendre l’osa.
Cligés le pris et le los a
De trestot le tornoiemant.
Au departir celeemant
Est revenuz a son ostel,
Por ce que nus ne d’un ne d’el
En parole ne le meïst ;
Et por ce que, se nus feïst
L’ostel as noires armes querre,
En une chanbre les anserre,
Que nus nes truisse ne ne voie,
Et fet a l’uis devers la voie
Les armes verz metre an presant,
Si les verront li trespassant.
Et se nus le demande et quiert,
Ne savront ou ses ostex iert.