Einsi Cligés est an la vile,
Si se çoile par itel guile ;
Et cil qui si prison estoient
De chief an chief la vile aloient,
Demandent le noir chevalier,
Mes nus ne lor set anseignier.
Et meïsmes li rois Artus
L’envoie querre et sus et jus ;
Mes tuit dïent : « Nos nel veïmes
Puis que nos del tornoi partimes,
Ne ne savomes qu’il devint. »
Vaslet le quierent plus de vint,
Que li rois i a envoiez.
Mes Cligés s’est si desvoiez
Qu’il n’en truevent nule antresaigne.
Del chevalier li rois se saigne,
Qant reconté li fu et dit
Qu’an ne trovoit grant ne petit
Qui sache anseignier son repaire,
Ne plus que s’il fust an Cesaire
Ou a Tolete ou a Quandie.
« Par foi, fet il, ne sai qu’an die,
Mes a grant mervoille me tient.
Ce fu fantosme, se devient,
Qui antre nos a conversé.
Maint chevalier a hui versé
Et des meillors les foiz an porte,
Qui ne verront ouan sa porte
Ne son païs ne sa contree ;
S’avra chascuns sa foi outree. »
Einsi dist li rois son pleisir,
Dont il se poïst bien teisir.
Mout ont parlé li baron tuit
Del noir chevalier cele nuit,
C’onques d’el parole ne tindrent.
L’andemain as armes revindrent
Texte du poème
