Page:Chrétien de Troyes - Roman de Perceval le Gallois - MS 248.pdf/50

Plus tost ne de plus grant vertu
Li prosdom sot moult de lescu
Et del cheval et de la lance
Car il ot apris des enfance
Si plot moult al vaslet et fist
Trestot quanque li prosdom fist
Quant il ot fait tot son cembel
Devant le vaslet et bien et bel
Qui bien sen ot garde donéé
Si sen vint lance levée
Al vaslet et demande li
Amis savrier vos issi
La lance et lescu demener
Et le cheval poindre et mener
Et cil qui tot a delivre
Ne queroit ja un jor plus vivre
Ne terre ne manoir neust
Mais quensi faire le seust
Ce quen ne set puet en aprendre
Qui i vielt pener et entendre
Fait li prosdom biaus amis chiers
Il convient a toz mestiers
Et paine et cuer et us avoir
Par cez en puet hom moult savoir
Et quant vos onques nel feistes
Naltrui faire nel veistes
Si vos faire nel savoiz
Honte ne blasme ni auroiz
Mais si vos nel aperniez
Honte et blasme i auriez