Page:Chrétien de Troyes - Roman de Perceval le Gallois - MS 248.pdf/51

Lors le fist lu prodom monter
Et il en comenca a porter
Si adroit la lance et lescu
Con sil eust toz jors vescu
Entornoiement et en guerres
Et ale par totes les terres
Cherchant batailles et aventure
Car ce li venoit de nature
Et quant nature li aprent
Et li cuers del tot i entent
Ne li puet estre rien grevaïgne
La ou nature et cuers se paine
Par cez.ii. si bien le faisoit
Qual prodom moult plaisoit
Et quil disoit en son corage
Que sil se fust tot son aaige
Darmes penez et entremis
Sen fust il assez bien apris

Quant li vaslet ot fait son tor
Devant le prodom el retor
Lance levéé sen repaire
Si con il li volt faire
Et dit sire raige bien fait
Cuidez vos donc que mestier mait
Paine si ge metre i voil
Onques rien ne virent mi oil
Dont ge si grant ？ eusse
Moult voldroie que gen seusse
Altretant con vos en savez
Fait li prosdom raison avez