K’Amors ne li dit noient ;
Ne por quant, s’ele m’oblie,
Ne l’oublierai je mie.
Por quant, se je n’ai aïe
De li et retenement,
Bien fera et cortoisie
S’aucune pitiés l’em prent.
Au descovrir mon talent
Se gart bien de l’escondire,
S’ele ne me velt ochirre.
Fols sui ki ne li ai dite
Ma dolor, ki est si grans.
Bien deüst estre petite
Par droit, tant sui fins amans ;
Mais je sui si meschaans
Ke quanques drois m’i avance,
Me retaut ma mescheance.
Tous i morrai en soffrance,
Mais sa beautés m’est garans,
De ma Dame, et la samblance
Ki tos mes maus fait plaisans,
Si ke je muir tous joians ;
Ke tant desir sa merite
Ke ceste mors me delite.
Noblet, je suis fins amans,
Si aim la millor eslite
Dont onques cançons fust dite.