SI VOIREMANT CON CELE DON JE CHANT.
Si voiremant con cele don je chant
Valt melz que totes les bones qui sont,
Et je l’aim plus que rien qui soit el mont,
Si me doint Deus s’amor senz décevoir ;
Que tel désir en ai et tel voloir,
Ou tant ou plus, Deus en seit la verté,
Si con malades desirre santé,
Desir je li et s’amor a avoir.
Or sai je bien que riens ne puet valoir
Tant con celi de cui j’ai tant chanté,
C’or ai veü et li et sa bealté
Et si sai bien que tant a de valor
Que je doi faire et outrage et folor
D’amer plus halt que ne m’avroit mestier ;
Et non por cant maint povre chevalier
Fait riches cuers venir a halte honor.
Ainz que fusse sospris de ceste amor,
Savoie je autre jent conseillier,
Et or sai bien d’altrui geu enseignier
Et si ne sai mie lo mien juër ;
Si sui con cil qui as eschas voit cler
Et qui très bien ensengne as autres gens,
Et kant il jue, si pert si son sens
Qu’il ne se seit escore de mater.
Hé ! las, dolanz, je ne sai tant chanter
Que ma Dame parçoive mes tormenz,
N’encor n’est pas si granz mes hardemanz
