Nagueres chevauchant pensoye,
Comme homme triste et douloreux,
Au dueil où il faut que je soye
Le plus dolant des amoureux ;
Puis que par son dart rigoureux
La mort me tolli[1] ma maistresse
Et me laissa seul langoureux
En la conduicte de Tristesse.
Si disoye, il fault que je cesse
De dicter et de rimoyer,
Et que j’abandonne et délaisse
Le rire pour le larmoyer.
Là me fault le temps employer,
Car plus n’ay sentement ne aise,
Soit d’escrire soit d’envoyer
Chose qu’à moy n’a[2] autruy plaise.
Qui vouldroit mon vouloir contraindre
A joyeuses choses escrire,
Ma plume n’y saurait attaindre,
Non feroit ma langue à les dire.
Je n’ay bouche qui puisse rire,
Que les yeulx ne la desmentissent :
Car le cueur l’en vouldroit desdire
Par les lermes qui des yeulx [3] issent.
Je laisse aux amoureulx malades.
Qui ont espoir d’allégement,
Faire chansons, ditz, et ballades,
Chacun en son entendement.
