et la faire remettre en son premier lieu ; car le dit Piefort l’avoit laissée en la petite chappelle de Saincte Geneviefve, près du bourg de Nanterre. Le Cardinal de Vendosme la rapporta, et lors faisoit beau voir mon fils porter honneur et révérence au Saint Sacrement, que chascun en le regardant se pernoit à pleurer d’amour de liesse et respect pour luy.
Le 14 d’octobre 1513, en venant de vespres de S. Léger de Cognac, je entrai en mon parc, et pres du Dedalus, la poste m’apport nouvelles fort bonnes du camp de mon filz, Lieutenant du Roy Louis XII, en la guerre de Picardie ; sçavoir est, que le Roi des Romains s’en estoit allé de Tournay, et que le Roi d’Angleterre s’affaiblissoit de jour en jour, à fin de s’en aller en l’aultre monde.
Le 17 octobre 1521, au Mont S. Martin, environ neuf heures du matin, mon filz marchant en ordre de bataille, fut requis par son Maistre d’Escole de luy donner l’Evesché de Condom quy vacquoit, ce que de très-bon cœur il luy octroya, ayant souvenance que devant qu’il fut Roy, à Amboise, en ma presence, il luy avoit promiz un evesché s’il en avoyt la puyssance un jour ou l’autre.
Le 15 octobre 1522, a S. Germain en Laye, je fus fort malade de goutte, et mon filz me veilla toute la nuict bien tendrement.
