Page:D'Orbigny - Le Conte de Floire et Blanchefleur, 1288.djvu/2

qui fu ja entre deus enfans,
bien avoit passé deus cens ans,
mais un boins clers li avoit dit,
qui l'avoit leü en escrit.
Elle commence avenanment.
Or oiiés son commencement.]

Uns rois estoit issus d'Espaigne ;
de chevaliers ot grant compaigne.
O sa nef ot la mer passee,
en Galisse fu arivee.
Felis ot non, si fu paiiens,
mer ot passé sor crestiiens
por el païs la proie prendre
et les viles livrer a cendre.
Un mois entier et quinze dis
sejorna li rois u païs ;
ne fu nus jors k'o sa maisnie
ne fust li rois en chevaucie.
Viles reuboit, avoirs praoit
et a ses nés tot conduisoit.
De quinze liues el rivache
ne remest ainc ne bués ne vace,
ne castel ne vile en estant ;
vilains n'i va son boef querant.
Es vos le païs tout destruit,
paiien en ont joie et deduit.
Donc s'en vaut li rois repairier.
Ses nés commanda a cargier,
et apele de ses fouriers
dusqu'a quarante cevaliers :
"Esranmant, fait il, vos armés !
Nous cargerons sans vos assés.
Alés lassus en ces chemins
gaitier por reuber pelerins."
Et cil en vont en la montaigne,
gardent aval parmi la plaigne,
pelerins voient qui montoient
la montaigne que il gardoient.
Il lor vont seure, ses assalent,
et li pelerin se defalent
de combatre tot li plusor,
lor avoir tendent por paour.
En la compaigne ot un François,
chevalier et preu et courtois,
qui au baron saint Jake aloit ;
une soie fille i menoit
qui a l'apostle s'ert vouee
ains qu'ele issist de sa contree
por son ami qui mors estoit,
de cui remese ençainte estoit.
Li chevaliers le vaut deffendre.
De lui ne caut a aus vif prendre,
ains l'ocïent, sel laissent mort
et sa fille mainent au port.
Au roi Felis l'ont presentee
et il l'a forment esgardee.
Bien aperçoit a son visage
que ele estoit de grant parage,
et dist s'il puet, a la roïne
fera present de la mescine.