Page:D'Orbigny - Le Conte de Floire et Blanchefleur, 1288.djvu/3

De cel avoir molt le pria
quant il por reuber mer passa.
A tant s'en entrent tot es nés
et amont traient sus les trés.
Or ont boin vent et bien portant,
si repairent lié et joiant.
Il n'orent pas deus jors erré
k'en lor païs sont arivé.
A tant est issus el rivage
li rois o trestot son barnage.
A Naples, a la cité bele,
est de lui venue novele
c'arivé sont lié et joiant,
ce dïent cil qui vont devant.
Cil de la vile encontre vont,
a l'encontrer grant joie font.
Tot se font lié de lor amis
c'arivé sont en lor païs.
Es vos le roi en la cité.
Son barnage a trestot mandé ;
son eskiec lor depart li rois
bien largement, comme cortois,
et por la part a la roïne
done de gaaing la mescine.
La roïne s'en fait molt lie,
en sa cambre l'a envoiie ;
sa loi li laist molt bien garder,
servir le fait et honerer ;
o li sovent jue et parole
et françois aprent de s'escole.
La mescine ert cortoise et prous,
molt se faisoit amer a tous.
La roïne molt bien servoit
comme cele qui sage estoit.
Un jour avint que la mescine
ouvroit es cambres la roïne
un confanon a oés le roi,
u ele peinst et lui et soi.
La roïne le vit palir,
coulor muer et tressalir
et a ses flans ses mains jeter,
sovent fremir et tressuer,
dont sot bien quel mal ele avoit
a son sanlant, qu'ençainte estoit.
Ele demande combien a
qu'ele reçut çou dont mal a.
Le terme sot bien et dist li.
La roïne, quant çou oï,
dist de cel terme estoit enprains
et a cel jour et noient ains.
Dont sorent bien sans deviner
le terme de lor enfanter.
Le jor de le Paske Flourie,
si com le raconte lor vie,
vint li termes k'eles devoient
enfanter çou dont griés estoient.
Travail orent et paine grant
tant que né furent li enfant.
Vallés fu nés de la paiiene.
et mescine ot la crestiiene.