Page:D'Orbigny - Le Conte de Floire et Blanchefleur, 1288.djvu/4

Li doi enfant, quant furent né,
de la feste furent nomé :
la crestiiene, por l'onor
de la feste, mist Blanceflor
non a sa fille, et li rois Floire
a son fil quant il sot l'estoire.
Li pere ama molt son enfant,
la mere plus u autretant.
Livré l'ont a la damoisele,
por çou qu'ele estoit sage et bele,
a norrir et a maistroier,
fors seulement de l'alaitier.
Une paiienne l'alaitoit,
car lor lois l'autre refusoit.
El le nouri molt gentement
et farda ententivement
plus que sa fille, et ne savoit
le quel des deux plus cier avoit.
Ensamble nori les enfans
tant que cascuns ot bien deus ans ;
onques ne lor sevra mangier
ne boire, fors seul l'alaitier.
Ensamble en un lit les coucoit,
andeus paissoit et abevroit.
Quant cinc ans orent li enfant,
molt furent bel et gent et grant.
De lor aé en nule terre
plus biaus enfans n'esteüst querre.
Quant li rois vit son fil si bel
de son eage damoisel
et aperçut que sot entendre,
a letres le vaut faire aprendre.
Gaidon l'a commandé, un mestre ;
miudres de lui ne pooit estre.
Ses parens ert, de sa maison ;
fondés des ars Gaides ot non.
Li roi commande son enfant
qu'il aprenge, et cil en plourant
li respont : "Sire, que fera
Blanceflors ? Et dont n'aprendra ?
Sans li ne puis jou pas aprendre
ne ne saroie lechon rendre."
Li roi respont :"Por vostre amor
ferai aprendre Blanceflor."
Es les vos andeus a l'escole.
Molt delivre orent la parole.
Cascuns d'aus deus tant aprendoit
pour l'autre que merveille estoit.
Li doi enfant molt s'entramoient
et de biauté s'entresambloient.
Nus d'aus deus conseil ne savoit
de soi quant l'autre ne veoit.
Au plus tost que souffri Nature
ont en amer mise lor cure.
En aprendre avoient boin sens,
du retenir millor porpens.