n’est point une creature de la Vertu ; non pas mesme de la Vertu du Sang : Le merite n’y a point de part ; non pas mesme le merite de la Race. Les Affranchis de Claudius, les Valets des Enfans de Constantin, les Gouverneurs des Enfans de Theodose, les Eusebes & les Eutropes ne sont point de legitimes Favoris, & beaucoup moins de legitimes Ministres. Et certes, j’ay pitié de l’Empire, & j’ay honte pour l’Empereur, quand je voy l’Empire & l’Empereur, dans ces mains serviles & mercenaires.
Je voy, avec horreur, ces vilains spectacles des Regnes infortunez, ces productions monstrüeuses des mauvais Temps. Temps aveugles, & pleins de tenebres ; Malheureux en Princes, & steriles d’Hommes. Et, à vostre avis, y a-t’il eu de Solitaire si eloigné de la Cour, & prenant si peu de part aux choses du Monde, qui ait pû regarder, sans despit, les choses tellement hors de leur place, & le Monde renversé de cette sorte ? Y a-t’il eu de si
